شلون تسوي شعار خاص بمتجرك الالكتروني؟
الشعار هو عنصر مرئي، ممكن يكون رمز أو صورة أو كتابة يستعمل للدلالة على علامة تجارية. يرتبط الشعار بالعلامة التجارية (المتجر الالكتروني) بصورة وطيدة، ضروري يعكس الشعار طبيعة عمل المتجر، نوع المنتجات، هدف ومبادئ المتجر.
الشعار لازم يكون:
- بسيط وواضح من أول نظرة
- يعكس طبيعة عمل المتجر
- مميز ومختلف عن باقي المتاجر
- قابل للاستخدام لفترة طويلة
- متعدد الاستخدامات
شنو أنواع الشعارات؟
1. شعار الاسم المختصر: يتكون من الأحرف الأولى للمتجر، يتراوح بين 2-4 أحرف
2. الشعار النصي: يتكون من أسم المتجر، عبارة عن مخطوطة مخصصة للعلامة التجارية
3. الشعار الايقوني: عبارة عن رمز بسيط للمتجر
4. الشعار "الكرتوني": شخصية مرسومة تميز المتجر
5. شعار رمزي: قريب من الشعار الايقوني، لكن يحتوي على تفاصيل أكثر
6. الشعار المركب: عبارة عن شعار رمزي ونصي بنفس الوقت
شلون تسوي شعار خاص بيك؟
أكيد أحسن طريقة تسوي بيها شعار باستخدام برامج احترافية مثل الفوتوشوب، لكن اذا أحد ما عنده البرنامج أو الخبرة الكافية حتى يشتغل بيه، من الممكن تستعمل برامج أبسط مثل Canva. يقدم تطبيق Canva عدد كبير من القوالب الجاهزة، ممكن تستعمل واحد من عندها وتخصصه لكن يفضل تجنب القوالب الجاهزة حتى يكون شعارك مميز أكثر.
حتى تسوي شعار خاص بيك، أول شي لازم تحدد اسم المتجر، طبيعة عمله ونوع المنتجات اللي تريد تبيعها، ومنو جمهورك. بعدها تفتح مشروع جديد بـ Canva وتستعمل الاشكال الرسوم الموجودة والنصوص حتى ترسم الشعار. تجمع كل العناصر اللي راح تستعملها بمكان واحد بعدين تبدي تخصصها.
لنأخذ مثال عن متجر اسمه "الشحنة"، متخصص ببيع الأجهزة الالكترونية، جمهوره الشباب بين 18-35 سنة. بالتالي الشعار راح يكون رمز لشحنة كهربائية، والألوان فاتحة حتى يكون جذاب أكثر للفئة العمرية المستهدفة. على هذا الأساس ترتب العناصر بشكلها النهائي وتغير احجامها وألوانها باللي يناسبها.
بعد ما تخلص تصميم الشعار، تكدر تستخرجه وتستعمله كصورة لصفحاتك على مواقع التواصل الاجتماعي، بمنشورات متجرك أو أي نشاطات أخرى تسويها.
