نشرة فدشي الأسبوعية
5 ايلول 2024
تعالوا تجارنا نشوف شنو الجديد هذا الأسبوع في نشرة فدشي الاسبوعية واللي هي عبارة عن صفحة راح تخليكم على اطلاع ومعرفة بكل شي جديد يصير عندنا وهذه النشرة راح تكون مستمرة كل أسبوع على دليل التاجر وعلى تطبيق فدشي، تابعونا دائمًا حتى ما يفوتكم شي.
شنو صار خلال الأسبوع الماضي؟
البرنامج الإرشادي: برنامج فدشي الإرشادي رجع الكم هذا الاسبوع وانفتح التقديم على البرنامج. هذا البرنامج راح يكون عبارة عن جلسات الكترونية مجانية يقدمها تجارنا المحترفين في مدة اسبوعين وراح يساعدوكم تبدأون مسيرتكم التجارية وية فدشي وتوصلون لمرحلة الاحتراف مثلهم. اذا كنتوا تجار جدد وبعدكم ما مثبتين أي طلب تكدرون تقدمون على برنامج فدشي الإرشادي من خلال هذا الرابط.
مسابقة ثلج: خلال الشهر الماضي كسرنا الجو وسوينالكم مسابقة ثلج وحبيتوها لذلك قررنا نكررها الكم هذا الشهر تجارنا. كل تفاصيل وشروط المسابقة تلكوها هنا وكل اللي عليكم هو تثبيت الطلبات باستخدام الرمز (ثلج). يلة تجارنا ثبتوا طلباتكم قبل نهاية يوم 16 من هذا الشهر.
قناة فدشي على الانستكرام: اطلقنا هذا الاسبوع ايضًا قناتنا على الانستكرام واللي راح تساعدكم تكونون على اطلاع دائم بكل تبليغات وتحديثات فدشي. يلة تجارنا انضموا لقناتنا هسة من خلال هذا الرابط ولا تخلون شي يفوتكم.
منتجات جديدة: المنتجات الجديدة مستمرة دائما وما تتوقف عندنا وفريقنا التجاري يحرص على توفير أكبر قدر ممكن من المنتجات الجديدة كل أسبوع وخلال الأسبوع الماضي فريقنا كدر يرفع الكم ما يقارب 50 منتج جديد على التطبيق من ضمنها دلة سليكون وطيارة تعليم الحروف والارقام والعديد من المنتجات الالكترونية بالاضافة الى توفر ساعة الترا والـ TV box من جديد.
دليل التاجر: هسة صرتوا تكدرون تختارون المواضيع اللي تحبوها داخل دليل التاجر من خلال الفلتر اللي توفر في واجهة دليل التاجر وبمجرد الضغط على اي فلتر من هذه الفلاتر راح تظهرلكم كل المقالات اللي تخص هذا الموضوع المختار. وايضًا صرتوا تكدرون تبحثون عن اي مقالة وموضوع من خلال مربع البحث في الواجهة.
تحديثات جديدة: تحديثاتنا ومفاجئاتنا الكم مستمرة تجارنا، وخلال الفترة الماضية فريقنا كان يعمل على تحديث جديد لتطبيق فدشي راح يوفرلكم العديد من المزايا المهمة واللي راح تحبوها. انتظروا التحديث القادم هذا الاسبوع وشاركونا في مواقعنا على تواصل الاجتماعي شنو من هذه المزايا هي المفضلة عندكم؟ ومن اهم الاضافات:
- محفظة التاجر داخل خانة حسابي واللي عليها راح نضيف اكثر من طريقة استلام للارباح قريبا
- التاجر يكدر يشغل ويطفي الاشعارات من داخل التطبيق ويختار نوع الاشعار اللي يريد يستلمه
- والاهم! التاجر يكدر يختار شنو يتخذ اجراء للطلبات اللي فشلت محاولة تسليمها مباشرة من التطبيق، يكدر يعيد ارسالها او يلغيها بدون مايقدم طلب لفريق الدعم!
